DITË KRENARIE PËR TROPOJËN: MARK QEHAJA VLERËSOHET ME TITULLIN “QYTETAR NDERI”

Bajram Curri, 10 shtator 2025

Një ditë e veçantë për Tropojën dhe mbarë Malësinë e Gjakovës u shënua më 10 shtator 2025, kur veprimtari i njohur, ushtaraku i lartë dhe drejtuesi i komunitetit shqiptaro-amerikan, Kolonel Mark Qehaja, u nderua me titullin e lartë “Qytetar Nderi i Tropojës”.

Ky vlerësim i akorduar nga Bashkia e Bajram Currit vjen si mirënjohje për kontributin e tij të gjatë në shërbim të atdheut, si dhe për veprimtarinë e palodhur në Shtetet e Bashkuara të Amerikës në mbrojtje dhe promovim të çështjes kombëtare shqiptare.

Që në orët e para të mëngjesit, qyteti i Bajram Currit u mbush me miq, dashamirës dhe personalitete nga troje të ndryshme shqiptare. Në ceremoni morën pjesë përfaqësues të pushtetit vendor, ushtarakë të lartë, shkrimtarë, poetë, artistë, gazetarë, mjekë, intelektualë dhe veprimtarë të shumtë të çështjes kombëtare.

Ceremonia nisi në ambientet e Bashkisë së Bajram Currit dhe vijoi më pas në Hotel “Eurobushi”, ku qindra të ftuar u bënë pjesë e një aktiviteti festiv që u kthye në një manifestim të vërtetë krenarie kombëtare.

Në fjalën e tij, Mark Qehaja e cilësoi këtë si ditën më të veçantë dhe më të gëzuar të jetës së tij.

“Sot ishte dita më e veçantë në jetën time. Ky vlerësim i lartë më nderon mua, familjen time dhe sakrificat e brezave të tërë që kanë punuar dhe kontribuar për vendin e tyre. E konsideroj këtë nderim si një vlerësim për çdo tropojan dhe për çdo Nikaj-Mërturas që e do dhe i shërben vendit të vet”, u shpreh ai.

Prej vitesh, si President i Shoqatës Shqiptaro-Amerikane “Skënderbeu” në New York, Mark Qehaja ka qenë pjesë e dhjetëra e qindra aktiviteteve patriotike, kulturore dhe kombëtare. Nën drejtimin e tij, shoqata ka organizuar veprimtari të shumta në mbështetje të çështjes shqiptare, deri në nivelet më të larta institucionale në Shtetet e Bashkuara të Amerikës, duke ngritur zërin për të drejtat e shqiptarëve dhe për dënimin e krimeve dhe gjenocidit serb në Kosovë.

Pas ceremonisë zyrtare, aktiviteti vijoi me një drekë festive ku morën pjesë mbi 200 të ftuar. Këngët, vallet, lahuta, recitimet dhe emocionet e shumta e shndërruan këtë ditë në një festë të paharruar, që shumë pjesëmarrës e krahasuan me një dasmë të madhe të gjithë Tropojës.

Për komunitetin e Nikaj-Mërturit, ky vlerësim përfaqëson një arsye të veçantë krenarie. Mark Qehaja mbetet një nga figurat që me punën, përkushtimin dhe veprimtarinë e tij ka nderuar jo vetëm familjen dhe fisin e vet, por edhe Tropojën, Malësinë e Gjakovës dhe kombin shqiptar.

Titulli “Qytetar Nderi i Tropojës” është një vlerësim i merituar për një jetë të tërë në shërbim të atdheut, kombit dhe vlerave shqiptare.